परिचय-
मुक्ता बर्वे ही रंगभूमी, मालिका आणि मराठी चित्रपटसृष्टीतील आघाडीची अभिनेत्री म्हणून सर्वांनाच सुपरिचीत आहे. चित्रपट आणि मालिकांमध्ये काम करण्याआधी मुक्ताने अनेक एकांकिका आणि नाटकांमध्ये काम करून अभिनयाचे धडे घेतले. ललित कला केंद्र ची विद्यार्थीनी असलेल्या मुक्ताने अल्पावधीतच आपल्या अभिनयाने स्वत:ची वेगळी ओळख निर्माण केली असून आज ती मराठी इंडस्ट्रीतील आघाडीची अभिनेत्री आहे. ललित कला केंद्रात असतांना मुक्ताने ‘सखाराम बाईंडर’, ‘नाग-मंडल’, ‘हॅम्लेट’, ‘सिता स्वयंवर’ या अजरामर नाटकांसाठी वेशभूषा आणि संगीत विभागात अनेक जबाबदा-या सांभाळल्या आहेत. तसेच विजया मेहता, भक्ती बर्वे, दिलीप प्रभावळकर, गिरीश कर्नाड, सतिश आळेकर, विजय केंकरे, वामन केंद्रे, महेश एलकुंचवार राजीव नाईक यांच्याकडून तिने अभिनयाचे धडे घेतले आहे.
अनेक मालिकांमधील तिच्या भूमिकांना आजही प्रेक्षक आठवतात. चित्रपटांसोबतच तिने अनेक नाटकांमध्ये काम करणे सुरूच ठेवले. त्यानंतर तिला अनेक चित्रपटांच्या संधी चालून आल्या. प्रतिभावंत दिग्दर्शक राजीव पाटील यांच्या ‘जोगवा’ चित्रपटातील तिची भूमिका अतिशय वेगळी आणि दर्जेदार अशी होती. त्यानंतर आलेल्या ‘मुंबई-पुणे-मुंबई’ चित्रपटात देखील प्रेक्षकांनी तिच्या भूमिकेला पसंत केले. ‘जोगवा’ आणि ‘मुंबई-पुणे-मुंबई’ या चित्रपटातील भूमिकांसाठी मुक्ताला राज्य सरकारचा सर्वोत्कॄष्ट अभिनेत्रीचा पुरस्कार मिळाला आहे.
